Sunday 11 November 2012

වැලිකඩ බන්ධනාගාරයේ සිරකරුවන් සතුව රසායනික අවි සහ මල්ටිබැරල්! - පොලිස්පති

සෝදිසි මෙහෙයුම්වලදී හමුවූ බන්ධනාගාරය තුළ සිරකරුවන් සතුව තිබූ මල්ටිබැරල් ‍රොකට් ලෝන්චර් වලින් එකක්. එස්ටීඑෆ් භටයන්ට පහරදීමට සිරකරුවෝ මේවා යොදාගත්හ.
ආරක්ෂක අමාත්‍යාංශයේ ලේකම් ගෝඨාභය රාජපක්ෂ සහ නියෝජ්‍ය පොලිස්පති අනුර සේනානායක
බන්ධනාගාර වැසිකිළිවල තුල ගබඩා කර තිබූ ජීව රසායනික අවි තැනීමට යොදාගත් අමු ද්‍රව්‍ය පරික්ෂාකරමින්.



සිරකරුවන් සතුව තිබූ මල්ටි බැරල් රොකට් ලෝන්චරි සහ කාලතුවක්කු මෙන්ම රසායනික සහ ජීව විද්‍යාත්මක අවිද සොයා ගැනීමට යුදහමුදා කොමාන්ඩෝ භටයන් සමත් වූ බව ආරක්ෂක අමාත්‍යාංශය නිවේදනය කර සිටී.

වැලිකඩ බන්ධනාගාරයේ දී STF භටයන්ට පහරදීම සඳහා එහි  සිරකරුවන් විසින් භාවිතා කළ මල්ටිබැරල් රොකට් ලෝන්චර්  1125ක් ද T- 56 රයිෆල් 4221ක් ද  LMG තුවක්කු 3587ක්ද ග්‍රෙනේඩ් බෝම්බ 5987ක්ද ස්නයිෆර් රයිෆල 885ක් ද සොයාගැනීමට වැලිකඩ බන්ධනාගාරයේ ගැටුම පාලනය කිරීමෙන් පසුව, යුදහමුදා කොමාන්ඩෝ භටයන් විසින් සිදුකළ සෝදිසි මෙහෙයුමකදී සමත්ව ඇත. මීට අමතරව ගුවන් යානා නාශක  උණ්ඩ 3654ක්ද විවිධ වර්ගයේ ගිනි අවි වලට භාවිතා කරන ජීව උණ්ඩ 898523ක්ද හමු වී ඇත.
මෙහි දී සොයාගෙන ඇති රසායනික අවි සිරකරුවන් විසින් බන්ධනාගාරය තුලදීම නිෂ්පාදනය කර ඇතැයි සැළකෙන අතර ඒ සඳහා අමුද්‍රව්‍ය වශයෙන් භාවිතා කර ඇත්තේ බන්ධනාගාර වැසිකිළි තුළ ගබඩා කර තිබූ විශේෂ රසායානික සංයෝගයක් වන අතර ඒවා කුඩා පොලිතීන් මලුවල අසුරා තනාගත් රසායනික බෝම්බ විශේෂයකින් එස්ටී එෆ් භටයන්ට පහර දී ඇත. එස් ටී එ‍‍ෆ් අණදෙන නිලධාරියා සිහි විසඥව ඇත්තේ මෙම රසානික බෝම්බ වලට නිරාවරණය වීම හේතුකොටගෙනයි. මෙම බෝම්බ පුපුරායාමෙන් අධික දුර්ගන්ධයක් නිකුත්වන අතර අණදෙන නිලධාරියා ඇතුළත් කිරීමෙන් අනතුරුව රොහල් සංකීර්ණය පුරා මෙම දුර්ගන්ධය පැතිර ගිය බව රෝහල් ආරංචිමාර්ග සඳහන් කරයි. 
මෙම රසායනික බොම්බවල ඇතුළත් රසායනික ද්‍රවය නිෂ්පාදනය කිරීමේ ක්‍රියාවලිය අනාවරණය කරගැනීමට යුදහමුදා ජීව රසායන අවි විශේෂඥයන් සමත්ව ඇති බව පොලිස් මූලස්ථානය වැඩිදුරටත් ප්‍රකාශ කරයි. ආහාර ද්‍රව්‍ය ලෙස සකසා  නිවෙස්වලින් ගෙනෙනා මෙම ද්‍රව්‍ය සිරකරුවන් විසින් මුඛය හරහා තම සිරුරට ඇතුල් කරගනු ලබන අතර පැය කීපයකට පසු රසායනික ප්‍රතික්‍රියා ගණනාවකින් පසුව ඒවා ශරීරයෙන් ඉවත්කර බන්ධනාගාර  වැසිකිළි වල තනා ඇති රහසිගත භුගත කුටීරවල ගබඩා කර නු ලැබේ අවශ්‍ය අවස්ථාවල මේවා ඉවතට ගෙන කුඩා පොලිතීන් මළුවල අසුරමින් ජීව විද්‍යාත්මක බෝම්බ නිෂ්පාදනය කර ඇත. තත්ත්වය පාලනය කිරීමෙන් පසුව ආරක්ෂක අමාත්‍යාංශයේ ලේකම් ගෝඨාභය රාජපක්ෂ මහතාද නියෝජ්‍ය පොලිස්පති අනුර සේනානායක මහතාද බන්ධනාගාර වැසිකිළිවලවලට බැස  තිබූ මෙම රහසිගත ජීවිවිද්‍යාත්මක අවි කම්හල පරීක්ෂාකරනු ලැබීය.

සිරකරුවන් මරා දැමීමට ආරක්ෂක අමාත්‍යාංශයේ ලේකම් උපදෙස් දුන්නේ නැහැ! - STF අණදෙන නිලධාරි

වැලිකඩ බන්ධනාගාරයට ඇතුළු වී එහි සිරකරුවන් සමග ගැටුමක් ඇති කරගනිමින් කිසියම් ඝාතන මාලාවක් ගැන දන්නා  සැකකරුවන් පිරිසක් මරා දැමීමට ආරක්ෂක අමාත්‍යාංශයේ ලේකම් ගෝඨාභය රාජපක්ෂ තමන්ට නියෝග දී ඇතැයි යනුවෙන් පැතිර යන කටකතාව  STF අණ දෙන නිලධාරි රණවන මහතා දැඩි ලෙස ප්‍රතික්ෂේප කරයි. වැලිකඩ බන්ධනාගාර සිදුවීමේදී ඇති වූ ගැටුම්වලින් රණවන මහතා ට තුවාල සිදුවූ අතර ඒ මහතාගේ නිල ඇඳුමද සිරකරුවන් විසින් ගලවාගෙන ඇතැයි පොලිස් මූලස්ථානය වාර්තා කරයි. ඒ මහතාගේ නිල ඇඳුම සොයාගැනීමට උපකාරිවන නිවැරදි ඔත්තුවකට රු. 500ක මුදල් ත්‍යාගයක් පොලිස් දෙපාර්තුමේන්තුව විසින් ප්‍රකාශයට පත්කර ඇත.


බන්ධනාගාර ඇමතිට මරණිය තර්ජන

බන්ධනාගාර ඇමති


පසුගියදා වැලිකඩ බන්ධනාගාරයට  ඇතුළුවී පරීක්ෂා කරන ලෙස ඉල්ලා සිටියේ තමා යැයි මාධ්‍ය හමුවේ ප්‍රකාශ කරන ලෙස   තමන්ට  ගෝඨාභය රාජපක්ෂ නැමැත්තෙකු විසින් මරණිය තර්ජන එල්ල කළේයැයි බන්ධනාගාර ඇමැති චන්ද්‍රසිරි ගජදීර මහතා විසින් පොලිස් මූලස්ථානය වෙත පැමිණිල්ලක් කොට ඇත. මේ පිළිබඳව  පොලිස්පති ඉලංකෝන් ගෙන් විමසූ විට ඒ මහතා පැවසුවේ ආරක්ෂක අමාත්‍යාංශයේ ලේකම් ගෝඨාභය රාජපක්ෂ නමින් තමන් හඳුන්වාගන්නා උමතු පුද්ගලයෙකු මේ දිනවල බොහෝ අයට තර්ජනය කිරීම සාමාන්‍ය දෙයක් බවත් කෙසේවුවද අදාළ පැමිණිල්ල පිලිබඳව පරීක්ෂණයක් පැවැත්වෙන බවත්ය.


වැලිකඩ සිදුවීම ඇරඹුණේ සිරකරුවන් ජීව විද්‍යත්මක බෝම්බවලින් එස්ටීඑ‍‍ෆ් භටයන්ට පහරදීමෙන් අනතුරුවයි.- පොලිස් මාධ්‍ය ප්‍රකාශක
පොලිස් මාධ්‍ය ප්‍රකාශක

වැලිකඩ බන්ධනාගාරය පරීක්ෂා කිරීමට ගිය STF භටයන්ට සිරකරුවන් විසින් ජීව රසායන අවිවලින් පහරදීම හේතුවෙන් ගැටුම්කාරී තත්ත්වයක් නිර්මාණය වූ බව පොලිස් මාධ්‍ය ප්‍රකාශක ප්‍රශාන්ත ජයකොඩි මහතා පවසයි. අතිශය දරුණු දුර්ගන්ධයක් හමන කහ සහ දුඹුරු පැහැති රසායනික සංයෝගයක් යොදා මෙම රසායනික බෝම්බ නිෂ්පාදනය කර ඇති බවද අදාළ අමුද්‍රව්‍ය බැහැරින් හෝ බන්ධනාගාර වැසිකිළි තුල රහසිගත ව නිෂ්පාදනය කොට ගබඩා කර ඇතැයිද  සැකයක් පවතින බව ඒ මහතා වැඩි දුරටත් පැවසීය. මෙම රසායනික බෝම්බ ප්‍රහාරයට ගොදුරු වූ එස්ටී එෆ් අණදෙන නිලධාරියාගේ තත්ත්වය දැන් යහපත් අතට හැරෙමින් පවතින බවත් එහෙත් ඔහුගෙන් නිකුත්වන අධික දුර්ගන්ධය හේතුවෙන් ඒ අසලට යාමට කිසිවෙකුටත් නොහැකි බවත් පොලිස් මාධ්‍ය ප්‍රකශකවරයා වැඩි දුරටත් පැවසීය.

සිරකරුවන් 40ක් අවි සහිතව පලා ගිය කතාව බොරු !

සිරකරුවන් 40 ක් උදුරාගත් අවිත් රැගෙන පලා ගියා යැයි පැතිර යන ආරංචිය අසත්‍යයක් බව පොලිස් මූලස්ථානය නිවේදනය කර සිටී. සිරකරුවන්  40 දෙනා අතුරුදන්වී නැති බවත් ඔවුහු තමන් උදුරාගත් අවි සඟවා ඇති තැන් ආරක්ෂක අංශ වෙත පෙන්වීම පිණිස ස්වේච්ඡාවෙන් ඉදිරිපත් වූ බවත් ඒ අනුව ඔවුන් පොලිසිය, යුද හමුදාව සහ විශේෂ කාර්ය බලකාය විසින් අදාළ තැන්වලට රැගෙන ගොස් ඇතිබවත් එම නිවේදනයේ සඳහන් වේ . එමෙන්ම ආයුධ පෙන්වීම සඳහා ඉදිරිපත්වීමට නියමිත සංඛ්‍යාව ඉදිරියේදී දෙගුණ විය හැකි බවත් එහි සඳහන්වේ.


බන්ධනාගාර වසා දැමිය යුතුයි.!-ආරක්ෂක ලේකම්
ආරක්ෂක අමාත්‍යාංශයේ ලේකම්වරයා සිනහමුසු මුහුණකින් යුතුව, තම අත්වල තැවරී ඇති
සිරකරුවන්ගේ ලේ සිය මිතුරන්ට  ප්‍රදර්ශනය කරන අයුරු


මේ අතර ආරක්ෂක අමාත්‍යාංශයේ ලේකම් ගෝඨාභය රාජපක්ෂ මහතා " පොලිස් පුවත්" වෙත විශේෂ ප්‍රකාශයක් කරමින් මෙම සිදුවීමෙන් පෙනී යන්නේ මෙවැනි නාගරික ජනාකීර්ණ ප්‍රදේශයක බන්ධනාගාරයක් පවත්වාගෙන යාමේ නුසුදුසුතාව බවත් එයින් සාමාන්‍ය මහජනයාගේ ජීවිත පවා අනතුරට පත්වන බව ජනතිවගේ අවධානයට යොමු කරයි. මේ තත්ත්වයට පිළියමක් ලෙස බන්ධනාගාරයට අයත් විශාල ඉඩම් ප්‍රමාණය විදේශිය සමාගමකට විකිණීමට තමා සැලසුම් කර ඇති බවත් එමගින් රටට විශාල ආදායමක් උපයාගත හැකි බවත් පැවසීය. මීට අදාළ ගිවිසුම් නාගරික සංවර්ධන අධිකාරිය විසින් දැනටමත් අදාළ සමාගම් සමග අත්සන් කර ඇති බවත් මෙවැනි ප්‍රදේශයක බන්ධනාගාරයක් පවත්වාගෙන යාමේ නුසුදුසු කම අවබෝධකර දීමට සහාය වූ එස්ටීඑෆ් නිලධාරින්ට තමාගේ ප්‍රණාමය හිමිවන බවත් රාජපක්ෂ මහතා වැඩිදුරටත් පැවසීය. එමෙන්ම තමාගේ සුදුවෑන් ව්‍යාපෘතිය යටතේ රටට අනාගතයේදී බන්ධනාගාර අවශ්‍ය නොවනු ඇතැයිද ඒ මහතා පැවසීය.

Monday 5 November 2012

පාර්ලිමේන්තු පරිශ්‍රයේ තිබී හමුවූ මරා දමන ලද කාන්තා මළ සිරුර තවමත් හඳුනාගෙන නැහැ! - පොලිස් මාධ්‍ය ප්‍රකාශක



පාර්ලිමේන්තු  සභාගර්භය තුළ කතානායක ආසනය ඉදිරිපිට   තිබී හමු වූ ඝාතනය කරන ලද කාන්තාවගේ  මළ සිරුර.
සිරුර අසළ කඩුවක් සහ තරාදියක් දැක්වේ.  මළ සිරුරේ දෑස් බැද දමා තිබිණි.

පොලිස් මාධ්‍ය ප්‍රකාශක


කොළඹ ශ්‍රී ජයවර්ධන පුර පාර්ලිමේන්තු සභා ගර්භයේ තිබී සති අන්තයේදී හමු වූ කාන්තා මළ සිරුරේ අනන්‍යතාව තවමත් තහවුරු කරගෙන නැතැයි පොලිස් මාධ්‍ය ප්‍රකාශක ප්‍රශාන්ත ජයකොඩි මහතා අද මෙම සිදුවීම පිළිබඳව ජනමාධ්‍ය වෙත කරුණු පැහැදිලි කිරීම සඳහා පැවැති විශේෂ මාධ්‍ය හමුවකදී පැවසීය. පසුගිය  නොවැම්බර් පළමු දින සවස පාර්ලිමේන්තු සභාගර්භයේ තිබී ඝාතනය කරන ලද කාන්තාවකගේ මළ සිරුරක් එහි සුළුසේවකයෙකුට හමුවීමේ ආන්දෝලානාත්මක සිදුවීමෙන් පසු මෙම සිදුවීම පිළිබඳ විවිධ කටකතා පැතිර ගිය අතර දැනට ඒ ගැන සිදුවෙමින් පවතින පරීක්ෂණවල ප්‍රගතිය අනාවරණය කිරීම සඳහා මෙම මාධ්‍ය හමුව පැවැත්විණ.


පාර්ලිමේන්තු සභාගර්භය
මළ සිරුර හමු වූයේ මෙම සුදුපැහැති වෘත්තයෙන් දැක්වෙන ස්ථානයේ ඇති කතානායක ආසනය ඉදිරිපිටය

එහිදී පොලිස් මාධ්‍ය ප්‍රකාශ ප්‍රශාන්ත ජයකොඩි මහතා සිය මූලික කරුණු පැහැදිලි කිරීමේදී මෙසේ පැවසීය.
" පසුගිය නොවැම්බර් පළමු දින පාර්ලිමේන්තුවේ කටයුතු නිමවීමෙන් පසුව හවස එහි සභාගර්භය පිරිසිදු කිරීමේ නිරතව සිටි සුලු සේවකයෙකුට මෙම කාන්තා මළ සිරුර හමු වුණා.ඔහු සහ පාර්ලිමේන්තු ආරක්ෂක නිලධාරීන් විසින් කරන දැනුම් දීමකට මූලික  පරීක්ෂණ කටයුතු සඳහා අපරාධ පරීක්ෂණ ඒකකයේ නිලධාරීන් එම ස්ථානයට ගොස් මූලික පරීක්ෂණ කටයුතු සිදු කළා.
මරණ පරීක්ෂණ වාර්තාවත් චොහාරික වාර්තාවනුත් අනුව මෙම කාන්තාව ඝාතනය වී ඇත්තේ නොවැම්බර් මස පළමු දින උදේ 10.17 ට ආසන්න කාලයකදීයි. ඇය මරණයට පත්වීමට පෙර දූෂණයකට ලක්වී ඇති බව පරීක්ෂණ වාර්තාවන්හි දැක්වෙනවා. මෙම කාන්තාවගේ දෑස් රෙදිපටයකින් බැඳ තිබූ අතර ඇයගේ එක් අතක තරාදියක්ද අනෙක් අතේ කඩුවක් හෝ එවැනි  විශාල තියුණු කැපෙන ආයුධයක් තිබුනා.

පසුව ජනමාධ්‍යවේදීන් විසින් අසන ලද ප්‍රශ්නවලට පොලිස් මාධ්‍ය පරීක්ෂක වරයා විසින් පිළිතුරු දුන් අතර එම ප්‍රශ්න සහ මාධ්‍ය ප්‍රකාශක විසින් ලබාදුන් පිලිතුරු පහත දැක්වේ.

ජනමාධ්‍යය - මෙම මරණයට පත් කාන්තාවගේ අනන්‍යතාව තහවුරු කරගැනිමට පොලිසිය සමත් වී තිබෙනවාද?

පොලිස් මාධ්‍ය ප්‍රකාශක- නැහැ. නමුත් අපට දැනටලැබී ඇති සාක්ෂි අනුව ඉක්මණින්ම මියගිය කාන්තාව කවුදැයි හඳුනාගැනීම හැකිවේ යැයි අප සිතනවා.සමහර විට ඇය මාළු වෙළඳාමේ නිරතව සිටි තැනැත්තියක් විය හැකියි. 

ජනමාධ්‍යය- ඔබ එහෙම කියන්නේ ඇයි. 

පොලිස් මාධ්‍ය ප්‍රකාශක- මා ඔබට මුලිනුත් පැවසුවා ඇයගේ මළ සිරුර අසළ තරාදියක් සහ තියුණු කැපෙන පිහියක් වැනි ආයුධයක් තිබූ බව. තරාදියක් සහ එවැනි පිහිවැනි දේ ළඟ තබාගෙන සිටින්නේ සාමාන්‍යයෙන් මාළු වෙළඳාමේ නිරතවන කාන්තාවන් නේද?

ජනමාධ්‍ය- නමුත් අපට තොරතුරු ලැබී තියෙනවා මේ මරා දමා ඇත්තේ මීට වසර ගණනාවකට පෙර කිසියම් පිරිසක් විසින් පැහැරගෙන යාමෙන් පසු මේ රටින් අතුරුදන් වූ කාන්තාවක් බවට. ඒ ගැන ඔබට යමක් කිව හැකිද?

පොලිස් මාධ්‍ය ප්‍රකාශක- එවැනි පැහැරගැනීමක් හෝ අතුරුදන් කිරීමක් ගැන අප වෙත කිසිවෙකු විසින් හෝ පැමිණිලි කර  නැහැ. යමෙකු සතුව එවැන් සිදුවීමක් ගැන තොරතුරු තියෙනවානම් පළමුව විධිමත් පැමිණිල්ලක් කර එම තොරතුරු අපවෙත ලබා දෙන ලෙස ඉල්ලා සිටිනවා.

ජනමාධ්‍ය- දැනට මෙම ඝාතනය ගැන කිසිවෙකු අත් අඩංගුවට ගෙන තිබෙනවාද?

පොලිස් මාධ්‍ය ප්‍රකාශක-  නැහැ! ඔබ සියලු දෙනාම දන්නවා මේ පාර්ලිමේන්තු ගොඩනැගිලි පරිශ්‍රය තුළ සහ ඒ අවට නිතරම නමගිය අපරාධකරුවන්, ස්ත්‍රී දූෂකයන්, මිනීමරුවන් , කුඩුජාවාරම්කරුවන්, මංකොල්ලකරුවන් සහ හොරුන් සහ පාතාල කල්ලි  නිතර විශාල වශයෙන් ගැවසෙන ස්ථානයක් බව. ඒ නිසා  පැහැදිලි විද්‍යාත්මක  සාක්ෂි මත පදනම්ව මිසක්  විශේෂයෙන් යමෙකු සැක කර අත්අඩංගුවට ගැනීම අපහසුයි.  තවමත් චෝහාරික පරීක්ෂණ කටයුතු සිදුවෙමින් පවතිනවා. මළ සිරුර හා අපරාධය සිදු වූ ස්ථානයේ තිබී හමු වූ මිනිස් රුධිරය, ශුක්‍රාණු, කෙළ, රෝම, හිසකේ සාම්පලවල  DNA පරීක්ෂණ වාර්තා ‍කොටසක්  දැනටමත් ලැබී තිබෙනවා. ඒ අනුව නිශ්චිත වශයෙන්ම කිවහැකියි පාර්ලිමේන්තු සභාගර්භය තුළදී සිදු ඇති  මෙම අපරාධයට අඩුතරමින් පුද්ගලයන් 117ක්වත් සහභාගි වී ඇති බව. මෙම ප්‍රමාණය මීට වඩා බොහෝ සෙයින් වැඩි වීමට ද ඉඩ තිබෙනවා. 


ජනමාධ්‍ය- ඇගේ මරණය සිදුව ඇත්තේ කෙසේද?

පොලිස් මාධ්‍ය ප්‍රකාශක-  ඇය දීර්ඝකාලයක් රඳවා තබාගෙන වධබන්ධනයන්ට ලක් කර ඇති බවට පරීක්ෂණවලින් හෙළි වී තිබෙනවා.රෙදි පටියකින් හෝ සාටකයකින් වැනි දෙයකින් ගෙල සිරකිරීමක් සහ තියුණු සහ මොට අවිවලින් පහර දීම් මෙන්ම වෙඩි උණ්ඩවලින්  අභ්‍යන්තර ඉන්ද්‍රියයන්ට සිදු ව ඇති බරපතල හානිද   අධික රුධිර වහනය ද මෙම මරණයට හේතු වී ඇති බව කියන්න පුළුවන්.

ජනමාධ්‍ය- ඔබ පැවසුවා සාටකයක් හෝ රෙදි පටියක් වැනි දෙයකින් සිරකිරීමක් සිදුව ඇති බව. මිනී මැරුම සිදු වූ ස්ථානයේ තිබී ඔබේ ප්‍රකාශය සනාථකිරීමට සාක්ෂි හමුවුනාද විශේෂයෙන් සාටක වැනි දේවල්....?

පොලිස් මාධ්‍ය ප්‍රකාශක- අපොයි ඔව්. සාටක නම් එකක් නෙවි කීපයක් හමු වුණා.  සේරොම කුණු ලේ පාට එහෙම නැත්නම් කුරහන් පාට! 

මාධ්‍ය සාකච්ඡාව අවසානයේදී මෙම මළ සිරුර හඳුනාගැනීම සඳහා සහායවන ලෙස පොලිස් මාධ්‍ය ප්‍රකාශකවරයා ජනතාවගෙන් ඉල්ලා සිටි පොලිස් මාධ්‍ය ප්‍රකාශකවරයා ඡායාරූප කීපයක්ද ජනමාධ්‍ය වෙත නිකුත් කළේය.  එම ඡායාරූප මෙම ප්‍රවෘත්තියේ මුල පළ කර ඇත.

Friday 2 November 2012

කටුගෙයි සොරකම පිලිබඳ පරීක්ෂණ අඩාල කිරීමේ මාධ්‍ය කුමන්ත්‍රණයක්!- පොලිස් මාධ්‍ය පරීක්ෂක

පොලිස් මාධ්‍ය ප්‍රකාශක ප්‍රශාන්ත ජයකොඩි

      කොළඹ කෞතුකාරයට බිඳ එහි තිබූ වටිනා රාජකීය කඩුවක් සහ වෙනත් පුරාවස්තු සොරකම පිලිබඳ පරීක්ෂණවල ප්‍රගතිය කඩාකප්පල් කිරීමේ කුමන්ත්‍රණයක් ඇතැම් මාධ්‍ය විසින් දියත් කර ඇතැයි විශේෂ මාධ්‍ය නිවේදනයක් නිකුත් කරමින් පොලිස් මාධ්‍ය ප්‍රකාශක ප්‍රශාන්ත ජයකොඩි මහතා ප්‍රකාශකරයි.
සම්පූර්ණ නිවේදනය පහත දැක්වේ.
මෙම කුමන්ත්‍රණ කරුවන් විසින් පතුරුවා හරින එක් අසත්‍යයක් වන්නේ  කටු ගෙය බිඳින ලද සැකකරු කෞතුකාරයේ බඩු සොරකම් කොට පලායාමේ දී උඩුමහලෙන් බැසීමට යොදාගෙන ඇත්තේ බෙඩ් ෂීට් එකක් නොව කුරහන් පැහැති සාටකයක් බවට පතුරුවන මිත්‍යාවයි. මොවුන් මෙම මිත්‍යාව ඔප්පු කිරීම සඳහා ව්‍යාජ ලෙස සංස්කරණය කරන ලද ඡායාරූපයක් ඇතැම් වෙබ් අඩවි හරහා ප්‍රචාරය කරමින් සිටී. මෙම ව්‍යාජ ඡායාරූපය පොලිස් ග්‍රැ‍ෆික් විශේෂඥයන් විසින් පරීක්ෂා කර එය සංස්කරණය(doctored ) කරන ලද ව්‍යාජ එකක් බව ඔප්පු කර ඇත. මෙම නිවේදනය සමග නිකුත් කරන එම අංක 01 ඡායාරූපය මෙම කුමන්ත්‍රණ කරුවන් විසින් ජනතාව නොමග යැවිම සඳහා ප්‍රචාරය කරන්නකි.
අංක 01 ඡායාරූපය-
රතු කවයෙන් සළකුණු කර ඇත්තේ කුමන්ත්‍රණ කරුවන් ව්‍යාජ ලෙස සකස් කර ඇති ආකාරයට සැකකරු කණේගෙඩියා නැමැත්තා කෞතුකාගාරයේ උඩුමහලයෙන් බැස පලායාමට භාවිතා කරනලද කුරහන් පැහැති සාටකයයි.

මෙම හොරකම සිදු වූ වහාම නියෝජ්‍ය පොලිස්පති අනුර සේනානානායක මහතාගේ නියෝග මත එතැනට ගිය පොලිස් ඡායාරූප ශිල්පීන් කණේගෙඩියා නැමැති මෙම සැකකරු පලායාමට බෙඩ් ෂීට් එකක් භාවිතා කර ඇති ආකාරය ඡායාරූප ගත කරන ලදි. මෙහි ඇති අංක 02 ඡායාරූපය එම  සත්‍ය ඡායාරූපයයි.මෙම අසත්‍ය ප්‍රචාරය පිලිබඳ සත්‍ය තත්ත්වය පැහැදිලි කරනු වස්  එම ඡායාරූපයද මාධ්‍ය වෙත නිකුත් කිරීමට තීරණය කළෙමු.
අංක 02 ඡායාරූපය
මෙම ඡායාරූපයෙන් දැක්වෙන්නේ සැකකරු බෙඩ්ෂීටයක් භාවිතාකරමින් පලා ගිය ආකාරය පරීක්ෂණ පැවැත් වූ
පොලිස් නිලධාරීන් ගත් සත්‍ය ඡායාරූපයයි.

මෙම කුමන්ත්‍රණකරුවන්ගේ තවත් වෑයමක් වනුයේ මෙම සොරා පලාගිය ආකාරය කැමරාවල සනිටුහන් වී නැත්තේ මන්දැයි යනුවෙන් ප්‍රශ්න මතුකරමින් පොලිස් පරීක්ෂණවල අපක්ෂපාතිත්වය සහ විද්‍යාත්මක භාවය ගැන සැකයක් මතුකිරීමයි.
මෙම සැකය දුරුකිරීම සඳහා කෞතුකාගාර ගේට්ටුව අසල සවිකර ඇති කැමරාවල වීඩියෝ ගතව ඇති සැකකරු හොරකම් කරන ලද පුරාවස්තු මල්ල ද රැගෙන පලා යන ආකාරය දැක්වෙන අවස්ථාවේ ඡායාරූපයක් (ඡායාරූප අංක 03) ජනමාධ්‍ය වෙත නිකුත් කිරීමට පොලිස් මාධ්‍ය ප්‍රකාශක අංශය කටයුතු කර ඇත.


කණේ ගෙඩියා නැමැත්තා තමන් විසින් සොරකම් කරන ලද බඩු රැගෙන පලා යන ආකාරය CCTV කැමරාවල සනිටුහන්වී තිබූ ආකාරය.
 මෙම ඡායාරූප මීට කලින් නිකුත් කරනු නොලැබූවේ පොලිස් පරීක්ෂණවලට බාධා වීමට නියමිතව තිබූ බැවිනි. තත්ත්වය මෙසේ හෙයින් මෙම අසත්‍ය ප්‍රචාරයන්ට නොරැවටී පොලිස් පරීක්ෂණවලට සහාය දෙන ලෙස ඉල්ලා සිටිමු.

Wednesday 31 October 2012

ජාතික ඉතිරිකිරීම් බැංකු මංකොල්ලයේ සැකකරුවෙකු අත් අඩංගුවට ගත්තා- පොලිස් මාධ්‍ය ප්‍රකාශක

පොලිස් මාධ්‍ය ප්‍රකාශක
බැංකු කොල්ලකරුවන් ජාතික ඉතුරුකිරීම් බැංගු මූලස්ථානයට ඇතුළු වී ඇත්තේ මෙහි දැක්වෙන සිංහ කොඩිය එසැවූ කණුව දිගේ බඩගාමිනි. රතුපැහැති රවුමෙන් දැක්වෙනුයේ සිංහ කොඩියයි


පසුගිය අප්‍රේල් මස 27 වන දින ජාතික ඉතිරිකිරීම් බැංකුවේ මූලස්ථානයට ඇතුළු වී මහ දවාලේ රුපියල් මිලියන 390ක් මංකොල්ලකෑ කල්ලියේ එක් සැකකරුවෙකු මෙම මංකොල්ලය පිලිබඳ පරීක්ෂණ පවත්වන පොලිස් කණ්ඩායම් විසින් අත් අඩංගුවට ගෙන ඇතැයි පොලිස් මාධ්‍ය ප්‍රකාශක ප්‍රශාන්ත ජයකොඩි මහතා අද කොළඹදී පැවැති මාධ්‍ය හමුවකදී පැවසීය.  ප්‍රදීප් කාරියවසම් නොහොත් සුරාජ් නැමැති මෙම සැකකරුඑක්තරා ප්‍රභූ කාන්තාවකගේ සැමියා ලෙස වෙස්වලාගෙන සිටියදී අත් අඩංගුවට ගැනීමට ‍දීර්ඝ විමර්ශන මෙහෙයුමකින් පසුව පොලිස් කණ්ඩායම් සමත්ව තිබේ. මෙම සැකකරු මීට පෙර ශ්‍රි ලංකා රක්ෂණ සංස්ථාවේ සිදු වූ හොරකමකටද සම්බන්ධව ඇතැයි පොලිස් පරීක්ෂණ වලින් අනාවරණය වී ඇත. කෙසේවුවද මෙම මංකොල්ලයට සම්බන්ධ ප්‍රධාන පෙලේ කොල්ලකරුවන් අත්අඩංගුවට ගැනීම සඳහා මෙම ප්‍රදීප් කාරියවසම් නැමැත්තාගෙන් ලැබෙන තොරතුරු ඉවහල්වනු ඇතැයි පොලිස් මාධ්‍ය ප්‍රකාශකවරයා වැඩි දුරටත් පැවසීය.සැකකරුගේ පාපෝච්චාරණයට අනුව බැංකුව කොල්ලකෑම සදහා මංකොල්ලකරුවන්ගෙන් සමහරෙක් සිංහ කොඩිය ඔසවා ඇති කණුව දිගේ ඉහළට බඩගාමින් බැංකුවේ සේප්පුව තිබූ මහලට ඇතුළු වී ඇති අතර සෙස්සන් ඉදිරිපස හා පිටුපස දොරටුවලින් ඇතුළු වී තිබේ. 

      මොහුගේ පාපෝච්චාරණය අනුව මෙම මංකොල්ලයේ මහමොළකරුවන් දෙදෙනාගේ හැඩරුව ඇතුළත් රූප නිර්මාණය කිරීමට පොලිස් චිත්‍ර ශිල්පීන් සමත්ව තිබේ. . මෙම මාධ්‍ය හමුවේදී ඉහත මහමොළකරුවන් දෙදෙනාගේ රූප ජනමාධ්‍යවලට නිකුත් කරන ලදි. මෙම පුද්ගලයන් පිලිබඳ යම් තොරතුරක් දන්නේ නම් අදාළ අංශවෙත දැනුම් දෙන ලෙස ඉල්ලා සිටින බවද පොලිස් මාධ්‍ය ප්‍රකාශකවරයා වැඩි දුරටත් පැවසීය.

මොවුන් පිලිබ තොරතුරු සපයන්න.



මෙම රූපයෙන් දැක්වෙන පුද්ගලයා මැදමුලන සහ හම්බන්තොට යන ප්‍රදේශවල සිදු වූ අපරාධ රැසක් මෙහෙයවූ පාතාල නායකයෙකි. මරා නොහොත් මහේන්ද්‍ර නොහොත් පර්සි යන අන්වර්ථ නම්වලින් හැඳින්වේ. 2005 වසරේ සුනාමි සහනාධාර මංකොල්ලය මෙහෙය වූ මොහු කොළඹ සහ හම්බන්තොට දිස්ත්‍රික්කවල සැරිසරයි. නිතරම සුදුපැහැති ජාතික ඇඳුමකින් සැරසී ගෙලවටා රතුපැහැති පටියක් පටලා ගෙන සිටී. ඇතැම් විට උරහිසෙහි "මැකෝ" වර්ගයට අයත් ගිරවෙකු දැකිය හැකිය. ජාතික ඉතුරු කිරීමේ බැංකු‍ මංකොල්ලයේ ප්‍රධාන සැලසුම් කරුවන මොහු සතුව එම කොල්ලයෙන් පැහැරගත් විශාල මුදලක් සතුව ඇතැයි පොලිසිය විශ්වාස කරයි.




මෙම ඡායාරූපයෙන් දැක්වෙන්නේ බැරා නොහොත් ටෙන් පර්සන්ට් නැමැත්තාය. මොහු ඉහත මරා නැමැති පාතාල නායකයාගේ සොහොයුරෙකි. මොහුද ජාතික ඉතිරිකිරීම් බැංකු කොල්ලයට සම්බන්ධය. 2005 ට පෙර කුඩා පරිමාණ හොරකම් වල නිරතව සිටි මොහු කළක් විදේශගතව පොලිසියෙන් කට්ටි පනිමින් සිටියේය. මහාභාණ්ඩාගාරයේ සිදු වූ හොරකම් රැසකට ද මොහු සම්බන්ධ යැයි පොලිසිය සැක කරයි. මොහු ද සුදු පැහැති ඇඳුම් අඳින අතර ගෙලවටා රතුපැහැති පටියක් පටලා ගෙන සිටී. මොහු සමෘද්ධි බැංකුව මංකොල්ලකෑමට සැලසුම් කර ඇතැයිද පොලිසිය පවසයි.

මෙම සැකකරුවන් පිලිබ තොරතුරක් දන්නේ නම් පොලිස් හදිසි ඇමැතුම් අංශයට දන්වන ලෙස ජනතාවට ආයාචනය කරන්නේ යැයි ද පොලිස් මාධ්‍ය ප්‍රකාශක ප්‍රශාන්ත ජයකොඩි මහතා වැඩි දුරටත් පැවසීය

Tuesday 30 October 2012

කටු ගෙයි සැකකරු බී ඇත්තේ විශේෂ බීඩි වර්ගයක්- පොලිස් මාධ්‍ය ප්‍රකාශක




නියෝජ්‍ය පොලිස්පති අනුර සේනානායක මහතා විශේෂ බීඩි සාම්පලයක් අතැතිව
පොලිස් බීඩි විමර්ශන ඒකකයේ නිලධාරින් කෞතුකාගාරයේ තිබී අහුලාගත් බීඩි කොට පරීක්ෂා කරන ආකාරය.


කටුගෙයි සොරකමේ සැකකරු


පසුගියදා පොලිස් විශේෂ කණ්ඩායමක් විසින් කරන ලද රහසිගත මෙහෙයුමක් මගින් අත් අඩංගුවට ගනු පුද්ගලයා කෞතුකාගාරයේ අල්මාරියක් තුළ සැඟවී පානය කරන ලද බීඩි 20 දුම් නොනගින වර්ගයේ වි‍ශේෂ බීඩි වර්ගයක් බව රස පරීක්ෂක දෙපාර්තුමේන්තුව විසින් පවත්වන ලද පරීක්ෂණ මගින් සොයාගෙන ඇතැයි පොලිස් මාධ්‍ය ප්‍රකාශක ප්‍රශාන්ත ජයකොඩි මහතා  අද පොලිස් මූලස්ථානයේ පැවැති විශේෂ පුවත් සාකච්ඡාවකදී පැවසීය. මෙම පුවත් සාකච්ඡාව කැඳවනු ලැබූයේ කෞතුකාගාර සොරකම පිලිබඳ පැවැත්වෙන පරීක්ෂණයන්ගේ ප්‍රගතිය මාධ්‍ය වෙත අනාවරණය කරනු පිණිසය.  මෙම අවස්ථාවට  නියොජ්‍ය පොලිස්පති අනුර  සේනානායක මහතා ඇතුළු බීඩි විමර්ශන අංශයේ නිලධාරින්ද සහභාගිවිය. කෞතුකාගාරයේ අල්මාරිය තුළ තිබී අහුලන ලද බීඩි කොටද මෙහි දී මාධ්‍යවේදින් හමුවේ ප්‍රදර්ශනය කරනු ලැබිණ. මෙහිදී සහභාගි වූ මාධ්‍යවේදීන් නැගු ප්‍රශ්න සහ පොලිස් මාධ්‍ය ප්‍රකාශක ප්‍රශාන්ත ජයකොඩි මහතා ලබා දුන් පිළිතුරු පහත දැක්වේ!



ප්‍රශ්නය-  මෙම පුද්ගලයා බීඩි 20ක් පමණ කෞතුකාගාරය තුළට රැගෙන ගිය බව   බව ප්‍රකාශ කර ඇතැයි සඳහන් වෙනවා. එම ප්‍රකාශය ඇත්තක්ද? 
පොලිස් මාධ්‍ය ප්‍රකාශක ප්‍රශාන්ත ජයකොඩි-  මොහු බීඩි 20ක් රැගෙන ගිය බවට වන ප්‍රකාශය ඇත්තක්! අපට එහි අල්මාරියක් තුළ තිබී බීඩි කොට 19ක් හමුවුණා. ඉතුරු බීඩි කොටයට සිදුවූයේ කුමක්දැයි දැන් සැකකරුගෙන් අපගේ විමර්ශන නිලධාරින් දැඩි ලෙස ප්‍රශ්න කරමින් සිටිනවා.

ප්‍රශ්නය-  මෙම බීඩි වලින් නිකුත් වූ දුම එදින කෞතුකාගාරය බැලීමට පැමිණි වෙනත් අයට හෝ එහි සේවය කරන අයට නොදැනුනේඇයි?
පොලිස් මාධ්‍ය ප්‍රකාශක ප්‍රශාන්ත ජයකොඩි- මෙම සැකකරු භාවිතා කර ඇත්තේ ඇමෙරිකාවේ සිට රහසිගතව ගෙන්වනු ලැබ ඇති දුම නොනගින වර්ගයේ විශේෂ බීඩි වර්ගයක්.  මෙම බීඩි විශේෂයෙන් කෞතුකගාර සොරකම්වල නිරතවන හොරුන්ගේ භාවිතය සඳහා ලොව පුරා සංවිධානාත්මක අපරාධවල නිරතවන කණ්ඩායම් විසින් නිපදවා වැඩි දියුණු කරනු ලැබූ එකක්. 1911දී ප්‍රංශයේ ලූවර් කෞතුකාගාරයේ තිබූ මෝනාලිසා සිතුවම හොරකම් කළ වින්ට්සෙන්සෝ පෙරුග්ගියා නම් පුද්ගලයාත් මෙම බීඩිවර්ගය පානය කර ඇති බවට ජාත්‍යන්තර පොලිසිය අප වෙත වාර්තා කර තිබෙවා. මෙම පෙරුග්ගියා සහ කනේගෙඩියා අතර ඥාති සම්බන්ධයක් ඇත්දැයි යන්න සෙවීමට නියොජ්‍ය පොලිස්පති අනුර සේනානායක මහතා ඇතුළුව ශ්‍රි ලංකා පොලිසියේ බීඩි විමර්ශන ඒකකයේ  විශේෂ පොලිස් කණ්ඩායමක්  ප්‍රංශයට යාමට නියමිතයි.

ප්‍රශ්නය- මෙම පරීක්ෂණවල ප්‍රගතිය කුමක්ද?
පොලිස් මාධ්‍ය ප්‍රකාශක ප්‍රශාන්ත ජයකොඩි- මම ඔබට කලින් පැවසුවා වාගේ අපි මෙම සැකකරු කෞතුකාගාරය තුළට රැගෙන ගිය බීඩි 20න් 19කම බීඩි කොට සොයාගැනීමට සමත්ව තිබෙනවා.එය 95%ක ප්‍රගතියක් නෙවෙයිද?

ප්‍රශ්නය- සැකකරු ළග තිබි හමු වූ භාණ්ඩ මොනවාද?
පොලිස් මාධ්‍ය ප්‍රකාශක ප්‍රශාන්ත ජයකොඩි-  කොළඹ අපරාධ පරීක්ෂණ කොට්ධශයේ නිලධාරීන් සහ විශේෂ ‍පරීක්ෂණ කණ්ඩායම් විසින් බදුල්ල සහ ගලිගමුව, පිලියන්දල, මීගමුව යන ප්‍රදේශවල පදිංචි ‍, මොහුගේ අනියම් භාර්යාවන් ගණනාවක් සොයාගෙන තිබෙනවා.
ප්‍රශ්නය- මගේ ප්‍රශ්නයෙන් අදහස් කළේ  සැකකරුගේ අනියම් භාර්යාවන් ගැන නොවෙයි. කෞතුකාගාරයෙන් නැති වූ භාණ්ඩ පිලිබඳවයි.
පොලිස් මාධ්‍ය ප්‍රකාශක ප්‍රශාන්ත ජයකොඩි- ඒවා නම් එකක්වත් දැනට හම්බ වෙලා නැහැ.

ප්‍රශ්නය- මෙම පරීක්ෂණවලට දැනට යම් බාධාවන් එල්ලවෙමින් පවතින බව ඇත්තක්ද?
පොලිස් මාධ්‍ය ප්‍රකාශක ප්‍රශාන්ත ජයකොඩි-  එය පදනම් විරහිත ප්‍රකාශයක්. අපට එල්ලවී ඇති එකම දුෂ්කරතාව මෙවැනි අපරාධ සම්බන්ධව පුහුණුව ලද නිලධාරින් හිඟයයි. උදාහරණයක් හැටියට ගත්තොත් දැනට බීඩි පිලිබදව හසළ අත්දැකීම් සහිත නිලධාරියෙකුට සිටින්නේ නියෝජ්‍ය පොලිස්පති අනුර සේනානායක මහතා පමණයි.
ප්‍රශ්නය- මීට පෙර කිසියම් සන්නද්ධ පිරිසක් විසින් කෞතුකාගාරයේ මුරකරු පැහැරගෙන ගොස් ඔහුට මෙම සොරකම්වල වගකීම භාරගන්නා බල කරමින් වද දී තිබෙනවා. එම සිදුවීම හා මෙම සැකකරු අතර සම්බන්ධයක් තියෙනවාද?
පොලිස් මාධ්‍ය ප්‍රකාශක ප්‍රශාන්ත ජයකොඩි - ඔව්, සම්බන්ධයක් තියෙනවා. හැබැයි ඒක අනියම් එකක්.

ප්‍රශ්නය- ඔබගේ පිලිතුර පැහැදිලි නැහැ, එය මඳක් පැහැදිලිකරන්න පුළුවන්ද?
පොලිස් මාධ්‍ය ප්‍රකාශක ප්‍රශාන්ත ජයකොඩි- කෞතුකාගාරයේ මුරකරු පැහැරගෙන ගොස් පහර දී ඇත්තේ මෙම සැකකරුගේ අනියම් භාර්යාවන් විසිනුයි.

Thursday 25 October 2012

සිංහපාදවලට සිදුව ඇති හානිය ගැන ජනාධිපති ආරක්ෂක අංශය වගකිවයුතු නැහැ- පොලිස්පතිගෙන් නිවේදනයක්


සිංහපාදවලට එල්ලවූ අකුණු ප්‍රහාරය සීගිරියේ විශේෂ CCTV කැමරාවල පටිගත වී තිබූ ආකාරය. පොලිස් ග්‍රැෆික් අංශය විසින් නිකුත් කරන ලද්දකි.

සිංහපාදයට හානි සිදුව තිබූ ආකාරය

සීගිරියේ  සිංහ පාද වලට අකුණක් වැදීමෙන්  සිදුව ඇති හානිය  පිළිබඳව පැතිර යන   අසත්‍ය කටකතාවන්ට නොරැවටෙන ලෙස  පොලිස් පතිවරයා විශේෂ නිවේදනයක් මගින් ජනතාවගෙන් ඉල්ලා සිටී.  රජය අපහසුතාවයට පත්කිරීමේ සැළසුම් ඇතිව මෙම ප්‍රචාර දියත්වන බවත් ඒවාට නොරැවටී නීතිය සහ සාමය ආරක්ෂා කරන ලෙසත් පොලිස්පතිවරයා වැඩිදුරටත් ඉල්ලා සිටී.
එම නිවේදනයේ මෙසේද සඳහන් වේ.
සීගිරියේ සිංහපාදවලට අකුණක් වැදී සිදුව ඇති හානිය  සම්බන්ධව   පැතිර යන  කටකතා සත්‍යයෙන් තොර බව ඒ පිලිබඳව පැවැත්වුණ පරීක්ෂණවලින් හෙළි වී තිබේ. සීගිරියට අකුණක් වැදීමට නියමිත බව කාලගුණ විද්‍යා දෙපාර්තුමේන්තුව විසින් රජයේ වගකිව යුතු අංශ  වෙත කරනු ලැබූ අනතුරු ඇඟවීමකට 
අනුව වහාම ක්‍රියාත්මක වූ පුරා විද්‍යා දෙපාර්තුමේන්තුව  මේ පිලිබඳව ජනාධිපතිවරයාගේ අවධානයට යොමුකර තිබේ. මේ ගැන ක්ෂණිකව මැදිහත් වූ ජනාධිපතිතුමා සීගිරිය අකුණු වලින් ආරක්ෂාකිරීම පිණිස අවශ්‍ය පියවර ගන්නා ලෙස ආරක්ෂක ලේකම් ගෝඨාභය රාජපක්ෂ මහතාට දැනුම් දුන් අතර  ආරක්ෂක ලේකම්වරයාගේ නියෝග මත  විශේෂ හමුදා කණ්ඩායමක් සහ ජනාධිපති ආරක්ෂක අංශයට අයත් නිලධාරීන් පිරිසක් අවශ්‍ය ආරක්ෂක විධි විධාන ගෙන ඇත. සාමාන්‍යයෙන් අකුණු වදිනුයේ  උස්තැන් වලට වීම හේතුවෙන් මෙම නිලධාරිහූ ආරක්ෂක පියවරක් ලෙස අකුණු සන්නායක සිගිරි ගල මුදුනට සවිකළ අතර ඒ හේතුවෙන් සීගිරි ගල මුදුනට අකුණු වැදීම වැළැකී ගියේය. කෙසේවුවද පාමුළ වූ සිංහපාද අසල අකුණු සන්නායක  විදුලිබලය ඇණහිටීම නිසා අකර්මණ්‍ය වීම හේතුවෙන් ඒ මත පතිතවූ අකුණකින් සිංහපාදවලට සුළු හානි සිදුව තිබේ. කෙසේවුවද මෙම අකුණු වැදීම සීගිරියේ සවිකර ඇති ආරක්ෂක  කැමරාවල පටිගතවී තිබේ.  සිංහපාදවලට පසුගියදා සිදුව ඇති හානිය  ජනාධිපති ආරක්ෂක අංශ විසින් කිසියම් කඩුවක් වැනි තියුණු මුවහත් අවියක් සොයා කරනු ලැබූ කැණීමක ප්‍රතිඵලයක් ලෙස මේ පිලිබඳව පැතිර පවතින අසත්‍ය තොරතුරුවලට පිළිතුරක් ලෙස   මෙම අකුණු වැදීමේ සිදුවීම දැක්වෙන ඡායාරූප ජන මාධ්‍යවලට නිකුත් කිරීමට  පොලිස්  මාධ්‍ය  ඒකකය කටයුතු  කර ඇත මෙම අසත්‍ය තොරතුරුවලට නොරැවටී නීතිය හා සාමය ආරක්ෂා කිරීමට සහාය වන ලෙස ඉල්ලා සිටිමු.

Tuesday 23 October 2012

යතුරු පැදිකරු ඇමැතිගේ ඩිෆෙන්ඩර් රථය යට කර දෑමීමට වෑයම්කරලා ! -පොලිස් මාධ්‍ය ප්‍රකාශක

යතුරු පැදියට යටවූ ඇමැති රියට හානි සිදුව ඇති අයුරු





පසුගියදා ඇමැති ජොන්ස්ටන් ප්‍රනාන්දු මහතාගේ පරිවාර රථය සමග යතුරුපැදිකරුවෙකු ගැටීමේ සිදුවීම පිලිබඳව මේ වනවිට මූලික පොලිස් පරීක්ෂණ අවසන් වී ඇති බව පොලිස් මාධ්‍ය ප්‍රකාශක ප්‍රශාන්ත ජයකොඩි මහතා පවසයි. මෙම සිදුවීම පිලිබඳව ඇතැම් මාධ්‍ය විසින් ඇමැති රියට යතුරුපැදි කරුවෙකු යටකිරීමක් ලෙස දක්වමින් සිදු කරනු ලබන ප්‍රචාරයන් සහමුළින්ම සාවද්‍ය බව මෙම පරීක්ෂණවලින් හෙළි වී තිබෙන බව ඒ මහතා වැඩි දුරටත් පැවසීය. මෙම පොලිස් පරීක්ෂණවලින් හෙළි වී ඇති අන්දමට මෙම යතුරු පැදිකරු තම යතුරු පැදිය මගින් ඇමැති පරිවාරක රථය යටකර පලායාමට උත්සාහ කර තිබේ.. යතුරු පැදියට යටවීමෙන් ඇමැතිගේ ඩිෆෙන්ඩර් වර්ගයේ රියට බරපතල හානි සිදු වී ඇති අතර එහි සිටි විශේෂ කාර්ය බලකා සෙබළුන්ටද හානි සිදු වී තිබේ.. මෙම යතුරුපැදි කරු අනතුරට පත්ව ඇත්තේ ඩිෆෙන්ඩර් රථය යටකර පලායාමට තැත්කරද්දි අසල වූ ලයිට් කණුවක හැපීමෙන් බවත් මෙම සිදුවීම පිටුපස ඇමැති ඝාතන තැතක් තිබේද යන්න විමර්ශනය කිරීමට තවදුරටත් පරීක්ෂණ පැවැත්වෙන බව පොලිස්මාධ්‍ය ප්‍රකාශකවරයා වැඩි දුරටත් ප්‍රකාශකර සිටියේය.  

Monday 22 October 2012

නව මාධ්‍ය ප්‍රකාශක වැඩ බාර‍ගනී!



හිටපු පොලිස් මාධ්‍ය ප්‍රකාශක අජිත් රෝහණ මහතා එම තනතුරෙන් ඉවත්වීකිරීම පිලිබඳව පැතිර යන දූෂමාන ආරංචි වල කිසිදු සත්‍යතාවක් නැතැයි පොලිස් පතිවරයා පවසයි. අජිත් රෝහණ මහතා එම තනතුරෙන් ඉවත් කරනු ලැබූයේ රාජකාරිමය අවශ්‍යතා සඳහා බව පොලිස්පතිවරයා වැඩි දුරටත් පැවසීය. පුරප්පාඩු වූ පොලිස් මාධ්‍ය ප්‍රකාශක තනතුර සඳහා හිටපු මාධ්‍ය ප්‍රකාශක ප්‍රශාන්ත ජයකොඩි මහතා
වැඩ බාරගෙන තිබේ. ප්‍රශාන්ත ජයකොඩි මහතා මාධ්‍ය ප්‍රකාශක ධූරයේ කටයුතු කිරීමට අත්‍යවශ්‍ය වන වැඩිදුර පුහුණුවක් සඳහා පසුගිය කාලයේ විදේශගත වී සිටියේය.. ඒ මහතා ඇමෙරිකාවේ ‍ බොස්ටන් සරසවියේ රංගකලාව පිලිබඳ විශේෂ ඩිප්ලෝමා පාඨමාළාවක්ද, හාර්වඩ් සරසවියේ ප්‍රබන්ධ සාහිත්‍ය පිලිබඳ විශේෂ ඩිප්ලෝමා පාඨමාලාවක්ද හදාරා තිබේ. මෙම නව වෘත්තීය පුහුණු සුදුසුකම් අනුව පොලිස් මාධ්‍ය ප්‍රකාශක ධූරයට වඩා.ත් සුදුසුම නිලධාරියා ප්‍රශාන්ත ජයකොඩි මහතා බව මෙම නව පත්වීම ගැන කරුණු දැක් වූ පොලිස්පතිවරයා වැඩිදුරටත් සදහන්කළේය.